Mirdita është trevë e begatë në burime natyrore, tradita të moçme e të ruajtura më së miri, histori, gojëdhëna dhe pasuri jomateriale, të cilat nuk duhen shpërfillur, por zbuluar, njohur, përkujdesur e mbrojtur.
Projekti Cultour Mirdita ka për qëllim t’ju njohë me këtë krahinë të pasur e qëndrestare, si dhe t’jua lehtësojë njohjen e zbulimin e saj, në mënyrë që t’ju krijojë mundësinë të hidhni hapat e parë drejt rrugëtimit tuaj vetjak në Mirditë.
Mes të tjerash, kemi krijuar dhe tri itinerare të ndryshme, të cilat ju ofrojnë e paraqesin shumë prej mundësive të larmishme turistike të zonës. Për t’ia nisur punës, filluam me identifikimin e tërë pikave me interes – turisitik, kulturor e zejtar – dhe mandej ndërtuam tri itenerare të posaçme, të cilat i digjitalizuam për t’jua bërë më të qasshme.
Të vizituarit e këtyre pikave me interes turistik dhe njohja me prodhimet e ndryshme vendase, do t’ju grishë që t’i blini, duke ndihmuar kësisoj tregtinë e prodhimin e zonës, si dhe t’ua përcillni miqve e të afërme tuaj, në mënyrë që të kenë mundësinë ta çmojnë dhe ata. Të gjitha pikat e përzgjedhura me kujdes, përfaqësojnë si të shkuarën, ashtu dhe të ardhmen e trevës së Mirditës, ndaj ju ftojmë që ta mbështesni, duke e vizituar, shijuar dhe përcjellë atë dhe prodhimet e saj.
Mirdita po përgatitet për ju, duke zhvilluar ngadalë e në mënyrë të qëndrueshme bujtinat, agroturizmin e zejtarinë e saj. Pret vetëm të vini për ta vizituar, që t’ju presë ngrohtësisht e me bujarinë e saj.
Mirë se të vini në Mirditë!
